ஜெய்ப்பூர்: ராஜஸ்தான் மாநிலத்தில் நேற்று (ஜூலை 11) பல்வேறு பகுதிகளில் கனமழை கொட்டித் தீர்த்தது. இதில், ஜெய்ப்பூரிலுள்ள அமர் அரண்மனைக்கு முன்னால் மலையில் அமைந்துள்ள கண்காணிப்பு கோபுரத்தில் மின்னல் தாக்கி 16 பேர் உயிரிழந்தனர். இதில் செல்பி எடுத்துக்கொண்டிருந்த குழந்தைகள் உள்ளிட்ட 11 பேரும் அடக்கம்.
இது குறித்து தகவலறிந்து சம்பவ இடத்திற்குச் சென்ற காவல் துறையினர், மீட்புக் குழுவினர் இதுவரை 30 பேரை மீட்டுள்ளனர். பலரும் படுகாயங்களுடன் மருத்துவமனையில் சிகிச்சை பெற்று வருகின்றனர்.
மின்னல் தாக்கி குழந்தைகள் உயிரிழப்பு
இதற்கிடையில், கோட்டா மாவட்டத்தைச் சேர்ந்த கன்வாஸ் தெஹ்ஸில் கார்டா கிராமத்தில் ஆடுகளை மேய்ப்பதற்காக காட்டுப்பகுதிக்குள் சென்ற 4 குழந்தைகள் மின்னல் தாக்கி சம்பவ இடத்திலேயே உயிரிழந்தனர்.
இதேபோல், தோல்பூரின் குடின்னா கிராமத்தைச் சேர்ந்த 3 குழந்தைகள் ஆடுகள் மேய்ப்பதற்காக சென்ற இடத்தில் மின்னல் தாக்கி உயிரிழந்தனர். சாக்சுவின் பகாரியா கிராமத்தில் வீட்டின் வெளியே நின்றிருந்த 12 வயது குழந்தை மின்னல் தாக்கியதில் மயங்கி விழுந்தது.
இதனைக் கண்ட அவரது பெற்றோர் உடனடியாக மருத்துவமனைக்கு அழைத்துச் சென்றனர். அங்கு அவரை பரிசோதித்த மருத்துவர் குழந்தை ஏற்கனவே உயிரிழந்ததாக தெரிவித்தார்.
முதலமைச்சர் நிதியுதவி
இதேபோல், ஜலவர் பகுதியைச் சேர்ந்த நபர் ஒருவர் மின்னல் தாக்கி உயிரிழந்தார். இதனையறிந்த, அம்மாநில முதலமைச்சர் அசோக் கெலாட் மின்னல் தாக்குதலில் உயிரிழந்தவர்கள் குடும்பத்தாருக்கு தலா ரூ.4 லட்சம் நிவாரணம் அளித்துள்ளார்.
மேலும், இந்த மின்னல் தாக்குதலில் உயிரிழந்தவர்களுக்கு முதலமைச்சர் அசோக் கெலட், சச்சின் பைலட், முன்னாள் முதலமைச்சர் வசுந்தரா ராஜே உள்ளிட்ட அரசியல் தலைவர்கள் ஆழ்ந்த இரங்கல் தெரிவித்துள்ளனர்.
இதையும் படிங்க: மழை வெள்ளம், இடி மின்னலில் தற்காத்துக் கொள்வது எப்படி? தமிழ்நாடு அரசின் தரமான வீடியோ...!
